Orientalstudies.az

AMEA-nın akademik Ziya Bünyadov adına Şərqşünaslıq İnstitutunun Yazılı abidələrin tədqiqi və nəşri şöbəsinin müdiri, filologiya elmləri doktoru, professor Mehdi Kazımovun “Незримые грани литературного наследия” (“Ədəbi irsin görünməyən tərəfləri”) kitabı çapdan çıxıb.

Müəllifin müxtəlif illərdə Azərbaycan və rus dillərində nəşr olunmuş elmi məqalələrini əhatə edən kitab Yaxın və Orta Şərq ədəbiyyatının aktual problemlərinə həsr olunub və xronoloji cəhətdən erkən orta əsrlərdən XX əsrin sonuna qədər dövrü əhatə edir. Kitabın ayrı-ayrı bölmələrində nizamişünaslıq və Nizami “Xəmsə”si ilə bağlı nəzirə ənənəsi məsələləri araşdırılır, orta əsrlər Azərbaycan və farsdilli ədəbiyyat nümayəndələrinin yaradıcılığı izlənilir, əlyazma irsi kontekstində bəzi mənbələr işıqlandırılır, eləcə də sufi ədəbiyyatına və xüsusilə az öyrənilmiş sufi nəsrinə diqqət yetirilir.

AMEA-nın akademik Ziya Bünyadov adına Şərqşünaslıq İnstitutunun baş elmi işçisi, filologiya elmləri doktoru, professor Elman Quliyev Azərbaycan Dövlət Pedaqoji Universitetinin 100-illiyi ilə əlaqədar Azərbaycan Respublikasının yubiley medalı ilə təltif edilib.

Şərqşünas alim bu medalla elm və təhsil nazirinin əmri ilə təltif olunub.

AMEA-nın akademik Ziya Bünyadov adına Şərqşünaslıq İnstitutunun əməkdaşları Azərbaycan Elm və Təhsil Nazirliyi yanında Elm və Ali Təhsil üzrə Dövlət Agentliyinin təşkilatçılığı ilə “Elsevier” şirkəti tərəfindən keçirilən vebinarda iştirak ediblər. İnstitutun Şərq ölkələrinin tarixşünaslığı şöbəsinin əməkdaşları - hüquq elmləri doktoru, dosent Zaur Məmmədov və Novruz Nuriyev “Scopus” və “ScienceDirect” elmmetrik bazalarında “Effektiv axtarış və təhlil üsulları” mövzusunda təşkil olunan vebinarda elmmetrik göstəricilərin axtarışı və təhlili üzrə təlim keçiblər. Vebinarda “Elsevier” şirkətinin elmi nəşriyyat və informasiya təhlili üzrə mütəxəssisi Saide Sak təlim keçib. S.Sak vebinar iştirakçılarının Elsevier Tədqiqatçı Akademiyası (Elsevier Researcher Academy) ilə bağlı suallarını da cavablandırıb.

AMEA-nın akademik Ziya Bünyadov adına Şərqşünaslıq İnstitutunun alimlərinin elmi məqalələri Qazaxıstanın beynəlxalq indeksli elmi jurnalında dərc olunub. İnstitutun elmi katibi, filologiya üzrə fəlsəfə doktoru, dosent Səbinə Səmədovanın “X-XI əsrlər klassik ərəb poeziyasının intibahında Bağdad ədəbi mühitinin rolu”, Ərəb filologiyası şöbəsinin müdiri, filologiya üzrə fəlsəfə doktoru, dosent Xumar Ələkbərovanın isə “Həvvanın örtülü üzü” arxasında qalan gizlinlərin açılması” adlı məqaləsi nüfuzlu ENDLESS LIGHT IN SCIENCE jurnalının növbəti sayında işıq üzü görüb.