Orientalstudies.az

Dekabrın 20-də AMEA akademik Ziya Bünyadov adına Şərqşünaslıq İnstitutunda görkəmli dilçi və türkoloq alim Əhməd Cəfəroğlunun anadan olmasının 120 illik yubileyinə həsr olunmuş elmi sessiya keçirildi. Sessiyanı giriş sözü ilə açan Şərqşünaslıq İnstitutunun direktoru, akademik Gövhər Baxşəliyeva Azərbaycan xalqının dilinə, ədəbiyyatına, tarixinə, etnoqrafiyasına dair çoxsaylı elmi əsərlərin müəllifi olan Əhməd Cəfəroğlunun Türkiyədə yazdığı bu əsərləri ilə Azərbaycanın tanıdılması, onun mədəniyyətinin təbliği sahəsində böyük rol oynadığını dedi. G.Baxşəliyeva Əhməd Cəfəroğlunun adını dünya türkologiya elminə böyük hərflərlə yazdığını qeyd etdi.

Dekabrın 12-14-də Almaniyanın Leypsiq şəhərində Leypsiq Universitetinin təşkil etdiyi “Mədəniyyətlərarası transfer – Yeni nəzəriyyənin 35 illik təcrübəsi” mövzusunda beynəlxalq konfrans keçirilib.

Konfransın əsas məqsədi keçən əsrin 80-ci illərindən etibarən Fransa və Almaniyanın ictimai-humanitar elmlərində tətbiq edilməyə başlanan və “mədəni transfer” adı ilə müasir Qərb elmində geniş yayılan və populyarlıq qazanan yeni nəzəriyyə və tədqiqat metodologiyasının keçdiyi inkişaf yolunu dəyərləndirmək, onun gələcək perspektivlərini müzakirə etməkdən ibarət idi. Son illərdə qeyd olunan nəzəriyyə və tədqiqat metodologiyası Avropada Şərq cəmiyyətlərinə, o cümlədən Qafqaz və Azərbaycana aid araşdırmalarda da tətbiq edilməyə başlanıb.

Dekabrın 13-də AMEA akademik Z.M.Bünyadov adı­na Şərqşünaslıq İnstitutunda böyük Azərbaycan yazıçısı Cəlil Məmmədquluzadənin 150 illik yubileyi ilə əlaqədar elmi seminar keçirilib.

Seminarı giriş sözü ilə açan AMEA akademik Z.Bünyadov adına Şərqşünaslıq İnstitutunun direktoru, akademik Gövhər Baxşəliyeva bu il Azərbaycan Respublikasının Prezidenti İlham Əliyevin Sərəncamına əsasən Azərbaycan ədəbiyyatının görkəmli nümayəndəsi, böyük yazıçı, dramaturq, publisist və ictimai xadim Cəlil Məmmədquluzadənin anadan olmasının 150 illiyi ilə əlaqədar ölkəmizdə və xaricdə müxtəlif tədbirlərlə keçirildiyini və Şərqşünaslıq İnstitutunun da bu Sərəncama əsasən böyük ədibin yubileyinə həsr olunmuş elmi seminar təşkil etdiyini dedi.

Səudiyyə Ərəbistanının Məhəmməd İbn Səud Universitetinin beynəlxalq əlaqələr şöbəsinin müdiri Məhəmməd Uteybi dekabrın 12-də AMEA akademik Z.M.Bünyadov adına Şərqşünaslıq İnstitutunda olub.

M.Uteybi əvvəlcə Şərqşünaslıq İnstitutunun direktoru, akademik  Gövhər Baxşəliyeva ilə görüşüb. G.Baxşəliyeva Azərbaycanın ərəb ölkələri ilə elmi, mədəni əlaqələrindən söz açaraq, bu əlaqələrin möhkəmlənməsində şərqşünas alimlərin mühüm rolunu qeyd edib. Gövhər xanım Şərqşünaslıq İnstitutunda ərəb ölkələrinin tarixi, iqtisadiyyatı, ərəb dili və ədəbiyyatı ilə bağlı aparılan tədqiqatlardan, nəşr olunan kitablardan söz açıb, ərəb mənbələrində bir çox xalqların, o cümlədən Azərbaycanın tarixinə dair mühüm məlumatların olduğunu qeyd edib.