Orientalstudies.az

AMEA-nın akademik Ziya Bünyadov adına Şərqşünaslıq İnstitutunun Ərəb filologiyası şöbəsinin aparıcı elmi işçisi, filologiya üzrə fəlsəfə doktoru, dosent Xumar Ələkbərovanın “Ərəb ədəbiyyatının ehramı Nəcib Məhfuz” kitabı işıq üzü görüb. Kitabın redaktoru Şərqşünaslıq İnstitutunun baş direktoru, akademik Gövhər Baxşəliyevadır.

Monoqrafiya ərəb dünyasının Nobel mükafatına layiq görülmüş ilk yazıçısı Nəcib Məhfuzun həyat və yaradıcılığına həsr olunub.

Kitab məhfuzsevərlər üçün əsl tövhədir. Monoqrafiyada dünyaşöhrətli misirli yazarın əsərləri dövrünün tarixi, siyasi-ictimai fonunda tədqiq edilib, insan psixologiyasının ən dərin qatlarını özündə əks etdirən bədii qəhrəmanları və taleləri müxtəlif prizmalardan təhlil olunub.

X.Ələkbərova kitabın sonunda yazıçının zəngin ədəbi irsindən “Göy qurşağı”, “Şəkil”, “Əxlaqsız ev”, “Müttəhim”, Hənzəl və polis”, “Naməlum düşmən” və s. hekayələrin tərcüməsini təqdim edib. Bu tərcümələr ərəb ədəbiyyatı sevərləri sevindirməklə yanaşı, N.Məhfuz dühası, bəşəri əhəmiyyətli ədəbi yaradıcılığı haqqında daha dolğun təəssürat yaratmağa imkan verir.

AMEA-nın akademik Ziya Bünyadov adına Şərqşünaslıq İnstitutunun təşkilatçılığı ilə keçirilmiş “Nizami Gəncəvi və Şərq ədəbiyyatları: ədəbi təsirin hüdudları” mövzusunda beynəlxalq elmi konfransın materialları çap olunub.

Azərbaycan, Türkiyə, Pakistan, Özbəkistan, Misir, İraq və İrandan olan 70-dən çox alimin iştirakı ilə keçirilmiş konfransın materialları sırasında Nizami Gəncəvinin etnik mənsubiyyətinə dair Şərqşünaslıq İnstitutunun direktoru, akademik Gövhər Baxşəliyevanın “Tarixi Azərbaycan torpaqlarında türklərin məskunlaşması”, şairin şəxsiyyəti ilə bağlı Cahan Ağamirovun “Nizami Gəncəvi və Heydər Əliyev şəxsiyyətləri”, Nizami irsinin yaşadılmasına dair Əzizə Ələkbərovanın “Mehriban Əliyevanın Nizami Gəncəvi irsinin yaşadılmasında fəaliyyəti” mövzusunda məruzələri diqqəti çəkir.

AMEA-nın akademik Z.M.Bünyadov adına Şərqşünaslıq İnstitutunun şöbə müdiri, fəlsəfə elmləri doktoru Roida Rzayevanın “Challenges of contemporaneity: postmodernity and multikulturalizm” (Müasirliyin çağırışları: postmoderniti və multikulturalizm)” adlı kitabı dünyanın ən nüfuzlu beynəlxalq elmi nəşriyyatlarından olan “Springer” nəşriyyatı tərəfindən 2021-ci ildə “SpringerLink Religion and Philosophy” elektron kitablar kolleksiyasına daxil edilib. R.Rzayevanın bu kitabı qlobal oxucu kütləsi tərəfindən əldə edilir. Qeyd edək ki, kitabın elektron versiyası nəşr olunduqdan sonra 4682 dəfə endirilib.

AMEA-nın akademik Ziya Bünyadov adına Şərqşünaslıq İnstitutunun icraçı direktoru, filologiya üzrə fəlsəfə doktoru, dosent Ruhəngiz Cümşüdlü noyabrın 28-də Rusiyanın Sankt-Peterburq şəhərində keçirilən “Mədəniyyətlərarası dialoq” 20-ci Beynəlxalq elmi simpoziumda onlayn şəkildə iştirak edib.

Azərbaycan, Türkiyə, Rusiya, Ukrayna, Qazaxıstan və Çindən 67 alimin qatıldığı simpoziumda azərbaycanlı şərqşünas “Məhəmməd Füzulinin ərəbcə şeirləri klassik ərəb poeziyası kontekstində” mövzusunda məruzə edib.