Orientalstudies.az

Mənəvi Dəyərlərin Təbliği Fondu 2019-cu ilin yekunları ilə əlaqədar Azərbaycanda milli-mənəvi dəyərlərin təbliğində fərqlənən bir sıra elm, təhsil, səhiyyə və mədəniyyət sahəsində fəaliyyət göstərən şəxsləri təltif edib.
Belə ki, Azərbaycan ədəbiyyatında milli-mənəvi dəyərlərimizin qorunması və təbliği istiqamətində səmərəli fəaliyyətinə görə xalq şairi Ramiz Rövşən, mədəniyyət və incəsənət sahəsində dəyərlərimizin təbliği istiqamətində səmərəli fəaliyyətinə görə xalq artisti Rasim Balayev, səhiyyə sahəsində xeyirxahlıq və mərhəmət dəyərlərinin təbliği, eləcə də insanpərvərlik prinsiplərinin qorunmasında səmərəli fəaliyyətinə görə cərrah-uroloq, transplantoloq, tibb üzrə fəlsəfə doktoru Rəşad Şolan, "Nəsimi ili" çərçivəsində İmadəddin Nəsimi irsinin araşdırılması və təbliği ilə bağlı səmərəli fəaliyyətinə görə AMEA-nın Şərqşünaslıq İnstitutunun aparıcı elmi işçisi, filologiya üzrə fəlsəfə doktoru Səadət Şıxıyeva və Azərbaycanda ilahiyyat elminin inkişafında göstərdiyi xidmətlərə və səmərəli fəaliyyətinə görə Azərbaycan İlahiyyat İnstitutunun prorektoru, ilahiyyat üzrə fəlsəfə doktoru Aqil Şirinov Mənəvi Dəyərlərin Təbliği Fondu tərəfindən təltif olunublar.

AMEA akademik Ziya Bünyadov adına Şərqşünaslıq İnstitutunun aparıcı elmi işçisi, filologiya üzrə fəlsəfə doktoru, dosent Səadət Şıxıyeva80 saylı orta məktəbdə böyük Azərbaycan şairi Nəsiminin 650 illiyinə həsr olunmuş tədbirdə iştirak edib. Məktəbin müəllim və şagird kollektivi ilə görüşdə şərqşünas alim şairin portretini qısa ştrixlərlə yaratmağa, daşlaşmış zehniyyəti dağıtmağa çalışıb. Uşaqların hazırladığı kompozisiyanı, səhnəciyi izləyən S.Şıxıyeva onlarda Nəsimi duyumuna heyran olduğunu bildirib. O, Nəsiminin "Sığmazam" şeirini əzbər bilən 6 yaşlı Fatimənin və Nəsimi obrazını təqdim edən şagird oğlanın xüsusi seçildiyini qeyd edib.

Sumqayıt Dövlət Universitetinin nəzdində Sumqayıt Dövlət Texniki Kollecində “Nəsimi ili” ilə əlaqədar "İmadəddin Nəsimi - 650" adlı informativ tədbir keçirilib.

Tədbiri giriş sözü ilə açan tədbirin təşkilatçısı, yazıçı, pedaqoq Günel Eyvazlı tələbələri, müəllimləri salamlayıb, Kollecə təşrif buyurmuş Nəsimişünas alim, AMEA akademik Ziya Bünyadov adına Şərqşünaslıq İnstitutunun aparıcı elmi işçisi, filologiya üzrə fəlsəfə doktoru Səadət Şıxıyevaya, şərqşünas alim Vüsal Hətəmova, Əməkdar jurnalist Eyruz Məmmədova dəvətlərini qəbul edib gəldiyi üçün təşəkkürünü bildirib. Eyni zamanda İmadəddin Nəsimi fəlsəfəsi, poeziyası və bu istiqamətdə yazılmış monoqrafiyalar, çap edilmiş kitablar haqqında geniş məlumat verib.

Dekabrın 20-də AMEA akademik Ziya Bünyadov adına Şərqşünaslıq İnstitutunda görkəmli dilçi və türkoloq alim Əhməd Cəfəroğlunun anadan olmasının 120 illik yubileyinə həsr olunmuş elmi sessiya keçirildi. Sessiyanı giriş sözü ilə açan Şərqşünaslıq İnstitutunun direktoru, akademik Gövhər Baxşəliyeva Azərbaycan xalqının dilinə, ədəbiyyatına, tarixinə, etnoqrafiyasına dair çoxsaylı elmi əsərlərin müəllifi olan Əhməd Cəfəroğlunun Türkiyədə yazdığı bu əsərləri ilə Azərbaycanın tanıdılması, onun mədəniyyətinin təbliği sahəsində böyük rol oynadığını dedi. G.Baxşəliyeva Əhməd Cəfəroğlunun adını dünya türkologiya elminə böyük hərflərlə yazdığını qeyd etdi.