Şərqşünaslıq İnstitutunun Təhsil şöbəsinin müdiri filologiya üzrə fəlsəfə doktoru Lalə Bayramova “Ərəb xalq ədəbiyyatında “Peyğəmbərlik” anlayışı” mövzusunda çıxış edib. Məruzəçi ərəb xalq ədəbiyyatında yüz iyirmi dörd peyğəmbərdən bir çoxunun epikləşdirilmiş obrazlarından söz açıb və peyğəmbərlik anlayışına şifahi xalq ədəbiyyatı aspektindən yanaşıb.
İnstitutunun Ərəb filologiyası şöbəsinin böyük elmi işçisi, institutun dissertasiya şurasının elmi katibi, filologiya üzrə fəlsəfə doktoru dosent Xanımzər Kərimova "İslam dinində ədəbiyyatın estetik mənbəyi" mövzusunda məruzə edib. Məruzəçi ərəb ədəbiyyatında “Ədəb” janrının İslam dinində rolu və onun estetik qaynaqları haqqında bəhs edib, xüsusilə müsəlmanların gözəl dini olan İslam dini və müqəddəs Qurani-Kərimin yalnız ərəb mədəniyyətində deyil, bütün dünyada bənzərsizvə bəlağətli söz abidəsi kimitanınmış və ərəb ədəbiyyatında ədəb və əxlaqı tərənnüm edən “Ədəb” janrının ən ecazkar estetik qaynağı olduğunu konfrans iştirakçıların nəzərinə çatdırıb.
İnstitutun Din və ictimai fikir tarixi şöbəsinin aparıcı elmi işçisi, fəlsəfə üzrə fəlsəfə doktoru Qadir Səfərov “Nasslara bağlılıq anlamında təsəvvüf" mövzusunda məruzə edib. Məruzədə təsəvvüf yolunun nə olursa olsun, Quran və Sünnədən aydın və davamlı olaraq ilham alındığı vurğulanıb. Məruzəçi peyğəmbərin hədislərindən bəzilərinin təsəvvüfün əsasını təşkil etdiyi tezisinin əhəmiyyətini vurğulayıb və araşdırmanın mövzusuna uyğun olaraq Quran və Sünnəyə, şəriətlə bağlılığını əlaqələndirib. İslamın mənəvi bir həyat tərzi olan təsəvvüfün “nassa” bağlılıq olaraq zahiri yaşama birliyi qeyd edilib.