Toplantıda ölkəmizi bu proqramın Azərbaycan üzrə əlaqələndiricisi, AMEA akad. Ziya Bünyadov adına Şərqşünaslıq İnstitutunun direktor müavini, akademik Şahin Mustafayev təmsil edib. O, öz çıxışının əvvəlində 2020-ci ildə Azərbaycanın 44 günlük Vətən müharibəsində öz torpaqlarını işğaldan azad etməsi barədə məlumat verib və pandemiya şəraitinin bütün sahələrə olduğu kimi, İpək Yolu ilə bağlı nəzərdə tutulmuş planların həyata keçirilməsinə də öz mənfi təsirini göstərdiyini qeyd edib. Bununla belə, Şahin Mustafayev ötən ildə ölkəmizdə bu sahədə bir sıra mühüm nailiyyətlərin əldə olunduğunu vurğulayıb. O, 2020-ci ildə Azərbaycanda Beynəlxalq Türk mədəniyyəti və irsi Fondunun layihəsi çərçivəsində ingilis və rus dillərində “Azərbaycan İpək Yolu üzərində” adlı fundamental monoqrafiyanın hazırlanıb nəşr olunması barədə toplantı iştirakçılarına məlumat verib. Bundan əlavə, Azərbaycanın irimiqyaslı YUNESKO İpək Yolu seriya nominasiyası proqramına fəal şəkildə qatılmaq planlarının olduğu vurğulanıb. Şahin Mustafayev həmçinin ötən il ölkəmizdə “İpək Yolu” brendi ilə həyata keçirilən bəzi infrastruktur layihələri və idman tədbirlərinin keçirildiyini iştirakçıların nəzərinə çatdırıb.