Noyabrın 29-da AMEA akademik Z.Bünyadov adına Şərqşünaslıq İnstitutunda rəhbər heyətin mülki müdafiə məşqi keçirilib.
Tədbirin mövzusu “Fövqəladə hadisələrin nəticələrinin aradan qaldırılması zamanı Mülki Müdafiə qüvvələrinin idarə olunmasının təşkili” olub. Məşqin məqsədi rəhbər heyəti tərəfindən Mülki Müdafiə planının öyrənilməsi və dəqiqləşdirilməsi, fövqəladə hallarda davamlı idarəetmənin təkmilləşdirilməsi və Mülki müdafiə tədbirlərini yerinə yetirərkən əməkdaşlara rəhbərlik etməkdə rəhbər, komandir-rəis heyətinin bacarığının artırılması olub.
Məşqlərə Fövqəladə Hallar Komissiyasının sədri akademik Şahin Mustafayev, Mülki Müdafiə qərargahının rəisi Namiq Abdullayev, Mülki Müdafiə rəhbər heyəti və hərbləşdirilməmiş dəstələrin komandir-rəis heyəti cəlb edilib.
Məşqləri akademik Şahin Mustafayev açıb. Daha sonra söz alan Mülki Müdafiə qərargah rəisi Namiq Abdullayev məşqlərin planını iştirakçılara çatdırıb. Tədbirdə məşq iştirakçılarının öz vəzifə borclarını mənimsənilmələri yoxlanılıb, onların sualları cavablandırılıb. Məşqlərin yekununda mülki müdafiə hazırlığına dair tapşırıqlar verilib.
