AMEA Şərqşünaslıq İnstitutunun əməkdaşı, filologiya üzrə fəlsəfə doktoru, dosent Səadət Şıxıyeva “Nəsiminin həyatı öz qələmi ilə” mövzusunda çıxış edərək Allahla təbiətin, idrakla eşqin vəhdəti prinsipinə söykənən, varlığın sirrini səsdə, hərfdə, sözdə görən, xalqı xaliqdən ayrı düşmüş zərrə sayan və o zərrəni öz tamına qovuşdurmağa çağıran bir ideologiyanı füsunkar şeir dili ilə yayan Azərbaycanlı şairin şəxsiyyətini, obrazını tamaşaçılara çatdırıb.
Məclisin qonağı olan AMEA N.Gəncəvi adına Milli Azərbaycan Ədəbiyyatı Muzeyinin Komparativistika və bədii tərcümə şöbəsinin müdiri, filologiya elmləri doktoru, professor Şəfəq Əlibəyli “Nəsiminin farsca “Divan”ının özəllikləri” mövzusunda çıxış edib. Azərbaycan, Orta Asiya, Anadolu, İran, İraq, Ərəbistan və Şərqin bir çox mədəni mərkəzlərində geniş yayılmış, Şərqin bir çox əlyazma xəzinələri və kitabxanalarının fəxri olan şairin “Divan”ının farsca nüsxəsi haqqında tamaşaçılara ətraflı məlumat verib.
Məclisdə həmçinin musiqili qonaqların, eləcə də qiraətçilərin ifası səsləndirilib, aktrotların ifasında “Mən bu cahana sığmazam” tamaşasından bir səhnə mümayiş etdirilib.
Tədbirin yekununda İmişli rayon İcra Hakimiyyətinin başçısı Vilyam Hacıyev çıxış edərək Nəsimi yaradıcılığı və onun yubileyinin qeyd olunmasının xüsusi önəmi barədə danışıb.