Oktyabrın 16-17-də Bakıda AMEA-nın Rəyasət Heyəti, akademik Z.M.Bünyadov adına Şərqşünaslıq İnstitutu və Milli Azərbaycan Tarixi Muzeyinin birgə təşkilatçılığı ilə keçirilmiş “Müasir şərqşünaslığın aktual problemləri” “(Ziya Bünyadov qiraətləri)” mövzusunda beynəlxalq elmi konfransa xarici ölkələrdən təşrif buyuranlar arasında 50-yə yaxın alimlə yanaşı, Rusiyadan gələn media nümayəndələri də var idi. Qonşu ölkənin “Arqumentı i faktı” həftəliyinin nəzdində nəşr olunan “Arqumentı nedeli” qəzetinin Şimali Qafqaz nəşrinin müxbiri Ayşat Kadilayeva da onların arasında idi.
Bakıdan dərin təəssüratlarla ayrılan xanım jurnalistin akademik Ziya Bünyadova və Bakıda keçirilmiş Ziya Bünyadov qiraətlərinə həsr olunmuş “Ölümsüzlüyə qovuşmuş ömür” məqaləsi təmsil etdiyi qəzetin tam 4 səhifəsində Rusiya oxucularına çatdırılıb. Məqalədə akademik Ziya Bünyadovun həyat və yaradıcılığından geniş bəhs edən A.Kadilayeva, oxucularına sözügedən konfrans barədə də ətraflı məlumat verib. Məqalə Bakı konfransı zamanı çəkilmiş zəngin fotomaterialla birgə təqdim edilib.
