Şərqşünaslıq İnstitutunda “Heydər Əliyev İli” ilə əlaqədar həyata keçirilən tədbirlərdən söz açan akademik G.Baxşəliyeva bu il Azərbaycan, İraq, Qırğızıstan, Qazaxıstan və Belarusdan 81 alimin iştirakı ilə “Heydər Əliyev və müasir Şərq” mövzusunda beynəlxalq elmi konfransın, 2 Fevral – Gənclər Gününə həsr olunmuş “Heydər Əliyev və Azərbaycan gəncliyi” adlı tədbirin, eləcə də "Heydər Əliyev və Azərbaycan elmi " mövzusunda elmi seminarın keçirildiyini qeyd edib, bir sıra nəşrlərin işıq üzü gördüyünü xatırladıb.
Dövlət quruculuğunun bütün sahələri kimi, müstəqil dövlətimizin beynəlxalq münasibətlərinin qurulmasının da Heydər Əliyevin adı ilə bağlı olduğunu deyən akademik G.Baxşəliyeva Ulu Öndərin Şərq siyasətinin müstəqil Azərbaycanı yaşatmaq, onu hərtərəfli inkişaf etdirmək, problemlərimizi həll etmək, xalqımızın dünya xalqları birliyində özünəlayiq yer tutmasına nail olmaq məqsədi daşıdığını, Ümummilli Liderin türkdilli dövlətlərlə münasibətlərin qurulmasına xüsusi önəm verdiyini qeyd edib.
Elmi sessiyada “Heydər Əliyev və türkdilli xalqların inteqrasiyası” mövzusunda məruzə edən institutun Mərkəzi Asiya ölkələri şöbəsinin baş elmi işçisi, siyasi elmlər doktoru, dosent Adil Mirabdullayev tarixi şəxsiyyət olan Ümummilli Lider Heydər Əliyevin xarici siyasətində Mərkəzi Asiyanın türkdilli dövlətləri ilə münasibətlərin xüsusi yer tutduğunu deyərək, Ulu Öndərin Qazaxıstan, Türkmənistan, Özbəkistan və Qırğızıstanla əlaqələrin qurulmasında və möhkəmləndirilməsində göstərdiyi xidmətdən danışıb.
“Heydər Əliyevin türk mədəniyyətinə verdiyi töhfələr” mövzusunda məruzə edən Türk filologiyası şöbəsinin elmi işçisi, filologiya üzrə fəlsəfə doktoru Xanım Abdullayeva Ümummilli Liderin bu sahədə xidmətləri sırasında “Kitabi-Dədə Qorqud” dastanının 1300 illik yubileyinin qeyd edilməsini, Bakıda Atatürk Mərkəzinin yaradılmasını, TÜRKSOY-un 8-ci toplantısının Bakıda keçirilməsini, Abay Kunanbayevin 150 illik yubileyinin keçirilməsini və s.-ni qeyd edərək, Ulu Öndərin Çingiz Aytmatov, Oljas Suleymanov və bu kimi onlarla türk dünyasının dəyərli şəxsiyyətlərinə göstərdiyi isti münasibətdən də bəhs edib.
Elmi sessiyanın sonunda məruzələr ətrafında çıxışlar olub, suallar cavablandırılıb.