Daha sonra çıxış edən məruzəçilərdən Fəlsəfə üzrə fəlsəfə doktoru Mail Yaqub Nəsimi yaradıcılığında irfan, həyat, fəlsəfə və s. çoxşaxəli qatlardan nümunələrlə misallar gətirərək izahlar verdi. Tədbirdə çıxış edən qonaqlardan "Milli Hüquq Evi"nin rəhbəri bir oxucu kimi ona Nəsimi yaradıcılığında böyük təsir edən məqamlardan danışdı, Nəsimi yaradıcılığında insana, vətənə, dünyaya sevginin sərhədsiz olduğunu vurğuladı. Gənc Nəsimişünas, AMEA Şərqşünaslıq İnstitutunun dissertantı Vüsal Hətəmov şairin dərin fəlsəfi görüşləri barədə fikirlərini bölüşdü. Qəzəllərindən birinin beytlərini ayrı-ayrılıqda təhlil etdi. Təbrizdən gəlmiş şair-tədqiqatçı Məhəmmədrza Çalğın Nəsiminin təkcə İslam aləmi üçün deyil, bəşəriyyət üçün önəmli fikir adamı, filosof olduğunu vurğuladı.
O qeyd etdi ki, sonrakı dövrlərdə Nəsiminin fəlsəfi fikrinin Avropada təsirinin olması danılmaz faktdır və bu təqdir olunmalıdır. Əli Kərim adına poeziya evinin direktoru şair-tərcüməçi İbrahim İlyaslı "Nəsimi ili"nin Azərbaycan ədəbi və mədəni həyatında böyük canlanma yaratdığını vurğuladı. Nəsimi yaradıcılığı istiqamətində böyük işlərin görüldüyünü bildirdi. Ədəbiyyatşünas alim, yazar Təranə Turan Rəhimli çıxışında Dünya Gənc Türk Yazarlar Birliyinin icra etdiyi "NƏSİMİ-650" adlı layihəni təqdir etdi. Nəsimi yaradıcılığının böyük bəşəri məziyyətlərindən söz açdı. Məruzəçi alimlər tədbirin sonunda DGTYB-nin fəxri fərmanı ilə təltif edildilər. Daha sonra xatirə şəkli çəkilərək, tədbirə yekun vuruldu.